O domingo 1 de chunio se zelebra en Zaragoza o desfile d’as Fuerzas Armadas españolas, ta mayor gloria d’o melitarismo español en una ziudat que o marketing politico d’a progresía españolista ha quiesto que en altros momentos sía d’a paz. Que ironías. Ta mayor umillazión s’ha colapsau o zentro d’a ziudat y s’ha ocupau un d’os parques más populars de Zaragoza, o parque Gran, (Cabezo de Buena Vista). O mesmo parque que garra gobierno munizipal (ni os de dreitas ni os supuestos “progresistas”, per clamar-les de bella traza) han sabiu cambear-le o nombre ofizial. Encara güe s’emporca iste importán libiano d’a ziudat con o nombre d’un dictador militar, pai d’un faxista. Amás d’aber de soportar a ostentazión d’o poderío (?!) melitar d’un exerzito espezialista en sozmeter a os pueblos (como contrimostró en a zaguera guerra que ganó, ta par de 1939, contra os pueblos de l’Estau español), amás de bier como a ziudat ye presa d’a irrazionalidat belizista y como se sozmete l’autibidat normal a os conzietos d’os melitars, amás de tot ixo, as zagueras notizias charran d’un tamborinazo de fuerte balgua simbolica. Un granizo siñal d’España de bels 20 metros cuadraus presidirá dende o domingo (y contamos que ta cutio) un d’os puestos más simbolicos de Zaragoza: A plaza Aragón. Chusto a o canto d’o monumento a o Chustiziazgo y a o Chustizia d’Aragón más conoxiu y popular, Juan V de Lanuza, el Mozo, feito per Francisco Vidal ta zaguerías d’o sieglo XIX. Juan V de Lanuza, con todas as suyas birtuz y os suyos defeutos (que prou que’n tendría arrienda) forma parte de l’imachinario coleutibo aragonés. De feito, iste monumento, que leba en a Plaza Aragón 104 años, ba estar construyiu grazias a la colaborazión d’o Conzello de Zaragoza (o mesmo Conzello que agora s’entusiasma con as cuarteladas españolas), a Diputazión Probinzial y a suscripzión popular de particulars. Dende agora ista memoria coleutiba será cusirada per un granizo siñal d’España (o mesmo que restituyó un tal Francisco Franco en 1936, modificando as colors d’o siñal d’a II Republica Española). Una buena alegoría de como se quiere a o nuestro país, Aragón: Umillada, sozmesa y, en pagas, contenta.
Puyalón de Cuchas
]]>