Dimpués d’a Proposición No de Lei presentada lo pasau 9 de marzo en o Congreso d’os Deputaus, a iniciativa d’as asociacions de defensa d’as Luengas Minorizadas d’o Estau espanyol, “y presentada en o suyo turno per EHBildu, en un cenyo de solidaridat con estas”, lo Congreso, con una mayoría de 194 votos a favor aprebó lo punto 4 que dictaba haber de ‘Impulsar y apoyar reformas estatutarias para la oficialidad de las lenguas propias que aún no son oficiales en una parte o la totalidad del territorio donde se hablan’, remeran dende Puyalón.
“Amás d’este importantismo punto pa la equiparación legal de l’aragonés y catalán en Aragón, lo Congreso aprebó los puntos 7 pa la ‘reciprocidad d’os meyos y administracions que tienen luengas comunas dentro de diferents buegas administrativas’ como ye lo caso d’o catalán en Aragón, y finalment un punto 8, aprebau per 290. Si, contando mesmo con o voto a favor de PP, y nomás 56 votos en contra, que abogaba per un ‘Respecto real, basau en dreitos y debers, y en l’actuación compromesa de totz los poders d’o Estau’”, sinyalan.
Por tot ixo, Puyalón demanda “altura de miras y responsabilidat a la hora d’a proxima modificación d’o Estatuto d’Autonomía d’Aragón, a proposito d’a supresión de aforamientos en os miembros d’as Cortz y Gubierno, y la modificación d’a Lei electoral con a representatividat de Teruel con independencia d’a suya población. Pa equiparar lo estatuto legal d’aragonés y catalán en Aragón, como luengas propias y minorizadas, a lo d’o castellán. En un exercicio d’igualdat y chusticia que habría d’haber plegau en os 80’s chunto a la resta de luengas minorizadas d’o Estau. Este estatus se presume como la sola vía pa la supervivencia d’estas luengas, como asinas l’explican multitut de resolucions Europeas, estudios sociolingüisticos y experiencias en atros países”.
D’este punto d’a PNL aprebau per lo Congreso d’os Deputaus, emana lo mandato pa las suyas respectivas Comunidatz d’encetar totz los trámites oportunos en as suyas Ordinacions, y incluyir la oficialidat d’as suyas luengas propias. “Y entendemos que la DGPL, encabezada per lo suyo director cheneral, Ignacio López Susín, debería liderar lo suyo complimiento”, sinyalan.
“Las Cortz d’Aragón, y lo Gubierno quatripartito, no ha d’asperar ni un menuto mas pa incluyir esta reforma. L’aragonés se troba entre las luengas en periglo d’extinción d’a Unión Europea, y lo catalán en Aragón va perdendo presencia en a carrera día a día. No podemos prescindir d’as ferramientas legals que guarencien lo suyo mantenimiento”, rematan dende Puyalón.