16 carreras de Zaragoza tendrán rotulación en aragonés y castellano

A propuesta de l’asociación Nogará, lo Concello de Zaragoza aprebó a zaguera semana que 16  carreras referents a toponimia tendrán rotulación en aragonés y castellano. Dimpués de 2 anyadas de lechislatura se prencipian a veyer chicotz cenyos de reconoiximiento d’a luenga aragonesa como luenga historica en Zaragoza.

Cenyos, que en parti han estau motivaus por a presión política, social y asociativa, en iste caso de l’asociación sinyalera d’ensinyanza d’aragonés en Zaragoza, AC. Nogará. Asociacions que han amostrau que van por debant d’as institucions en o reconoiximiento y reposición d’os dreitos lingüisticos.

Dende Puyalón asperamos que no siga només que un cenyo, y istas politicas tiengan continidat en lo que queda de lechislatura y en sucesivos gobiernos.

En iste caso ha estau dende a concellería de Cultura, pero creyemos que a concellería de Urbanismo ye a que habría d’empentar istos cambios. De vez, as concellerías de cultura, y a d’educación han de prencipiar a prener midas urchents de reposición y visibilidat d’a luenga aragonesa en Zaragoza.