A Expo 2008 de Zaragoza ha trayiu con ella a “Gran Transformazión” d’a nuestra ziudá. Isto ye lo que nos diz a propaganda ofizial. Y sin garra duda, Zaragoza se ye trasformando, pero… ¿en qué?
As operazions urbanisticas ligadas con as macrofitas (Expo, Fórum, Copa America, Olimpiadas…) no son un efecto secundario sino que a suya razón d’estar. A dengún no se l’eslampa que, ta fer as exposizions y charradas d’antis, ese estau prou con a Feria de Muestras, a Multiusos y bel atro puesto más. Pero ixe no yera l’ochetibo, prou que no.
Os tres meses que nos asperan de fuegos artifizials son a sincusa, pero tamién un alazet, ta tornar a nuestra ziudá en una interpresa dinamica y competitiba- una marca- que compita con atras ziudaz por turismo y imbersions. Ta ello, Zaragoza, ha de quedar “polida”, “escoscada” y, más que más, chenerar “un buen ambién ta os negozios”.
A macrofita ye uno d’os alazez ta creyar a ziudá-marca, a ziudá-competitiba, a ziudá-interpresa, porque fa más rapeda a trasformazión urbana, pero sobre tot porque chenera o consenso d’os achens economicos y sozials, y a delera ziudadana arredol d’un obchetibo común: a Expo, que ascape se meterá a o mesmo ran que a propia ziudá. Asinas se ba chenerando un “patriotismo de ziudá” an que no bi ha intreses contrarios, do lo que ye bueno ta la ziudá ye bueno ta os suyos ciudadanos, an que no bi ha tasamén rufierta, an que no bi ha fisuras arredol d’o modelo de desembolique.
Y ta triunfar, o tema trigau ye asabelo d’importán. Sin duda una Expo sobre maquinaria agricola no ese dispertau a mesma delera sozial. Siempre se trigan temas como a paz, o esporte, a cultura,… Aquí se trigó “augua y desembolique sostenible”, con lo que, antimás, se ganaba o refirme de parti d’o tarabidau sozial que podría aber estau critico con tot lo que se beniba denzima. O problema ye que lo que ye bueno ta amanar a o turismo y a imbersión, lo que ye bueno ta “a ziudá”, cuasi nunca no’n ye ta la chen que bibimos en ella.
A Expo nos deixa una ziudá ipotecada por añadas, si no decadas, en una baruca de malfurriar (papeleras, bancos y fuens exclusibas a 1.873 euros a unidá, fronteras y edifizios que se abientan a l’atro’l diya de trancar…) y de desfases presupuestarios por as prisas. O angluzioso negozio ta os mesmos poquez de siempre a costa d’as arcas publicas (de Zaragoza u de Madrí) ya ye feito. A la resta nos quedarán unos serbizios sozials mui amanaus a la precariedá y a la pribatizazión, unos menimos presupuestos ta cultura…
A Expo nos dixa un río feriu a o suyo paso por Zaragoza, con una canal foradada en o suyo seno ta meter-ie barcos grans ta turistas. Un azute. Unas riberas, por fin apañadas, dimpués de picar zentenars d’arbols porque feban más amonico o ritmo d’as obras. Más d’una dezena de denunzia por parti d’organizazions ambientalistas que les han plegau o silenzio por rispuesta.
A Expo nos dixa un meandro d’ortal periurbano tornau en un zentro d’ozio pribau (campo de golf, canal d’auguas furas, apartahotel…) y en un parque empresarial a unos pres de risa.
A Expo nos dixa una ziudá con a carrera biedada ta o suyo enfuelgue y ta la protesta. Zientos de polizías de diferens cuerpos, que han beniu ta quedar-se-ie, se’n encargarán d’os que nos ne queixemos, pero tamién d’os probes y no tan probes que quieran dormir en os parques, d’os que minchen u beban difuera d’un negozio, d’os que chuguen… A Expo nos dixa una ziudá estendillada de tot, con nuebos bicos como Arcosur que contaban con gran oposizión politica y sozial, dica que por arte d’a machia d’a permuta de terrenos de Ranillas, una parti d’ixa oposición esparixió de tot.
Nuebos bicos con milenta de bibiendas nuebas tanimientres más de 50.000 bibiendas continan buedas en o zentro consolidau d’a ziudá. Nuebos bicos en meyo de cosa que caldrá urbanizar y dotar de serbizios tanimientres a os bicos antigos les cal ixos recursos ta mantener-sen. Nuebos bicos que les caldrá l’auto ta mober-se-ne.
Pero más que más, a Expo nos dixa en o camín d’una traza de desembolique minchador de recursos naturals y de personas, con ixa lochica que prima o benefizio pribau por enzima d’o bien sozial que se ha a menister ta “meter a ziudá en o mapa” y trayer imbersions y turistas. An que a ziudadanía no somos que mendigos de treballo, consumidors/as y publico disposau ta o aplauso. Y tot ello con a ipocresía d’a etiqueta berde como chenerador de lechitimidá.
Por tot isto femos un clamamiento, no nomás a no colaborar con a Expo, si no a luitar contra ista macrofita y lo que representa, d’as trazas que cadagún trobe más a menister; a resistir-se contra istas trazas de desembolique; a rebelar-se contra la ziudá-interpresa; a crebar os consensos lechitimadors; a creyar resistenzias.
Siñan: Colectivo de Objeción y Antimilitarismo-Alternativa Antimilitarista MOC (Zaragoza), Ecologistas en Acción (Zaragoza), Asociación El Cantero de Torrero (Zaragoza), Espazio Alternatibo (Zaragoza), Bloque Independentista de Cuchas (Aragón).
]]>