9 de Marzo: Puyalón solizita l’abstenzión

Puyalón de Cuchas, organizazión politica aragonesa independentista y sozialista, debán d’as eslezions a las cortes españolas d’o benién domingo, 9 de marzo, quiere fer constar debán d’a opinión publica aragonesa:

1. Puyalón de Cuchas solizita l’abstenzión d’as suyas militans y simpatizans, fendo-lo estensibo a toz aquels aragonesistas de cuchas que aspiren a que Aragón seiga una nazión sobirana, dau que denguna d’as candidaturas que concurren a istas eslezions españolas replegan en os suyos programas eleutorals os prinzipios minimos y irrenunziables de sobiranía y sozialismo ta o pueblo aragonés.
2. Gane qui gane, Aragón seguirá igual. Rai si ye o PSOE de Zapatero u o PP de Rajoy qui gobierna en l’Estau español. A Constituzión monarquica que consagra a indisoluble unidat de l’estau seguirá bichén, por o que o dominio colonial de l’Estau sobre Aragón (igual que sobre atras nazions sin estau) continará. A o mesmo tiempo, se sigue negando o dreito a l’autodeterminazión d’os pueblos (internazionalmén reconoxiu en a Carta Internazional d’os Dreitos Zibils y Politicos, que l’estau español siñó ipocritamén en 1977) y se pretende fartar a suya sete de libertat con estatutos d’autonomía que, en o caso aragonés, no ha resuelto garra problema. En tot caso, los ha ixamplau, chenerando una nueba clase politica sucursalista de tot que a suya unica aspirazión ye asolar-se en o poder a cualsiquier pre y “trunfar en Madrid”.
3. Dende Puyalón de Cuchas se seguirá treballando politicamén dende l’alazet, ta ubrir o debate en a soziedat aragonesa sobre a nezesidat de que o pueblo nuestro pueda exerzer a suya autodeterminazión y constituyir-se en nazión libre y sobirana, en piet d’igualdat con a resta de pueblos d’a Tierra. D’a mesma traza s’anima a toz os militans aragonesistas de cuchas a treballar en as diferens organizazions que tienen entre os suyos ochetibos a consecuzión d’a sobiranía y o sozialismo ta Aragón.

Puyalón de Cuchas