Puyalón de Cuchas, a organización politica d’a cucha independentista aragonesa, quiere fer plegar toda a suya solidaridat, almiración y respecto a os miners asturianos, lioneses y aragoneses por a luita eixemplar encetada mientres istos zaguers meses en esfensa d’os suyos puestos de treballo, as suyas tierras y o futuro d’as suyas redoladas.
A tenacidat y a fuerza con a que istos diyas esfendetz o pan d’os vuestros fillos y fillas y un futuro digno t’os vuestros lugars son un autentico eixemplo de constancia y luita. Con razón dispertatz l’almiración y o respecto d’os treballadors y treballadoras con consciencia de clase en qualsiquier puesto d’o mundo.
Sotz, sin garra dubda, un verdadero eixemplo de dignidat, perseverancia y solidaridat, en istos tiempos tan dificils que nos han tocau vivir t’o conchunto d’a clase treballadera. O vuestro eixemplo de luita permaneixerá por muito tiempo en as retinas d’os y d’as aragonesas de cucha.
Puyalón de Cuchas participará en a manifestación de l’11 de chulio en Madrit (Castiella), y de vez, fa un clamamiento solidario y participativo a la sociedat aragonesa ta que secunde ditas movilizacions convencidas de que o triunfo d’as reivindicacions mineras suposarán empente quantitativo y qualitativo a la correlación de fuerzas d’o movimiento obrero.
En Aragón, a 9 de Julio de 2012
]]>